סוכה שפענדלעך

א פשוטער איד פשוט'ע הארץ פשוט'ע מחשבות

פשוט'ע הענט מיט פשוט'ע געוואוקסן פשוט שאקלען - וועלטן.

-

ס'איז דא א מארגן וואס איז נאך נעכטן. און, ס'איז דא א מארגן וואס איז וועגן נעכטן. ס'איז אנדערש.

-

מ'קען אוועקלייגן די סוכה. צענעמען די סוכה. ארויפטראגן די סוכה. פארפאקן די סוכה. אין הארץ.

- ס'דא וואס טאנצן מיט די תורה ס'דא וואס טאנצן פאר די תורה. ס'דא וואס טאנצן. אויף די תורה?!

-

פון אתרוג מאכט מען קאמפאט פון הושענות מַצות פון לולב שריפת חמץ הדסים פאר שב"ק און די הענט? בלייבן זיי שאקלען?

-

א סוכה איז נאר 'אונטער' אמונה איז נאר זיך אונטערווארפן.

-

סתם, שוויצן צווישן אידן איז אידיש. סתם, טאנצן צווישן אידן איז חסידיש. סתם, זינגען צווישן אידן איז א קידוש.

- הקפות מיט די תורה ארום אידן הקפות מיט אידן ארום די תורה הקפות א איד ארום די תורה הקפות די תורה ארום די איד. בחזירתו פרע הקפותיו.

-

דער ישמח משה האט געזען משה רבינו דער יטב לב האט געזען די זיידע איך וויל זען. כאטש מיר.

-

לעיני כל ישראל, לויט די אויגן פון אידן בראשית ברא.